ہالی ووڈ کے معروف اداکاروں زینڈایا اور ٹام ہالینڈ کی ایک تصویر سوشل میڈیا پر تیزی سے وائرل ہوئی ہے، جس میں انہیں مبینہ طور پر بچے کی پیدائش کا اعلان کرتے ہوئے دکھایا گیا۔ اس تصویر میں زینڈایا کو ہاتھ میں مبینہ طور پر حمل کا پازیٹو ٹیسٹ پکڑے ہوئے دکھایا گیا، جبکہ ٹام ہالینڈ ان کے قریب کھڑے الٹراساؤنڈ کی تصاویر تھامے ہوئے نظر آئے۔ دونوں اداکاروں کو تصویر میں انتہائی خوشگوار موڈ میں ایک دوسرے کی طرف دیکھتے ہوئے دکھایا گیا تھا۔ یہ تصویر انسٹاگرام پر آتے ہی مداحوں کی توجہ کا مرکز بن گئی، اور ہزاروں لوگوں نے اس پوسٹ کو لائک، شیئر اور اس پر تبصرے کیے۔

تاہم، مداحوں کے لیے سب سے اہم بات یہ جاننا ہے کہ یہ تصویر حقیقت پر مبنی نہیں، بلکہ مکمل طور پر مداحوں کی تیار کردہ ہے۔ تصویر وائرل ہونے کے بعد سوشل میڈیا صارفین نے اس میں ٹام ہالینڈ کے قد کو دیکھ کر فوری طور پر اسے مصنوعی ذہانت کا کرشمہ قرار دے دیا۔ ایک صارف نے طنزیہ انداز میں لکھا کہ کب سے ٹام، زینڈایا سے قد میں لمبے ہو گئے؟ ایک اور صارف نے تبصرہ کیا کہ اس تصویر کے مصنوعی ذہانت پر مبنی ہونے کی دو وجوہات ہیں؛ پہلی یہ کہ ٹام ہالینڈ ان سے چھوٹے قد کے ہیں، اور دوسری... ہاں بس یہی۔ ایک اور مداح نے مزاحیہ انداز میں لکھا کہ بیبی اسپائیڈر آنے والا ہے۔

مذکورہ تصویر انسٹاگرام کے ایک فین پیج لائف از فریسکو پر شیئر کی گئی تھی، اور یہ زینڈایا اور ٹام ہالینڈ کی جانب سے کسی بھی حمل کے اعلان کی اصل تصویر نہیں۔ اس پیج نے تصویر کے ساتھ کیپشن لکھا کہ ورسز سے آگے بھی کہانی جاری رہتی ہے، جو بظاہر ٹام ہالینڈ کے مشہور کردار اسپائیڈر مین کے حوالے سے ایک تفریحی اشارہ معلوم ہوتا ہے۔ تصویر اتنی مہارت سے بنائی گئی تھی کہ وہ بالکل اصلی دکھائی دیتی ہے، جس کی وجہ سے مداحوں میں شدید جوش و خروش پھیل گیا۔

علاوہ ازیں، نہ تو زینڈایا اور نہ ہی ٹام ہالینڈ کی جانب سے حمل کے حوالے سے کوئی باضابطہ اعلان کیا گیا ہے۔ فی الحال، یہ وائرل ہونے والی تصویر محض ایک مداح کا تکھیل ہے کہ اس جوڑے کا مستقبل کا خاندان کیسا دکھائی دے سکتا ہے۔